Youth dev’t plan sa 5 ka barangay tukion sa Komite sa Kabatan-onan

Mahatagan og katumanan ang mga programa, proyekto ug gitinguha nga mga kalihokan sa barangay 4, 12, Carmen, Lapasan ug Tablon alang sa dugang kalamboan sa kabatan-onan sa ilang dapit.

Kini human nadawat sa komite sa Sports and Youth Development ubos ni Konsehal John Michael Seno ang Sangguniang Kabataan (SK) 6th year Comprehensive Barangay Youth Development Plan (CBYDP) sulod sa tuig 2020-2025 ug Annual Barangay Youth Investment Plan (ABYIP) sa maong lima ka barangay alang sa dugang pagtoon ug rekomendasyon.

Nasayran nga ang tanang lakang miagi sa makuting pagsusi ug deliberasyon sa buhatan sa City Planning Development Office (CPDO) ug Oro Youth Development Office (OYDO), uban sa mga hintungdang buhatan sa City Hall sa pagseguro nga nahiuyon sa balaod.

Si Seno naglaum nga makatambong ang mga opisyal sa nahisgutang barangay sa umaabot nga tigom aron mahatagan sa katin-awan ang nasukip sa maong plano aron mapatuman sa ilang tagsa-tagsa ka barangay.