Water tower gihangyong mahimong Nat’l Historical Structure

KONSIDERAHON sa Komite sa Turismo ni Konsehal Jay Pascual ang hangyo sa Cagayan de Oro City Historical and Cultural Commission (HISCCOM) nga manganlan ang Cagayan Waterworks Tank kon “Water Tower” isip National Historical Structure sa dakbayan.

Sa resolosyon sa HISCCOM, gihangyo nga matabangan sa komite dinha sa paghangyo sa National Historical Commission of the Philippines (NHCP) nga mamahimong historical site ang maong water tower ug mainstalar ang historical marker.

Gipasabot nga tipik na sa kasaysayan ang water tower nga gisugdan pagtukod niadtong tuig 1919 ug nahuman sa tuig 1922. Kini kabahin sa waterworks project sa Cagayan de Misamis nga maong labing unang tinubdan sa tubig sa syudad.

Ang resolosyon sa HISCCOM girekomendar ni Mayor Oscar Moreno sa tinguha nga mapalapdan ang kabililhon ug mahatagan sa importansyang magpabilin sa kasaysayan sa pagkamugna sa maong tower.

Niini, ang Komite ni Pascual gipaabot nga mopatawag og tigom aron magtuki ug mahatagan sa katin-awan ang maong lakang.