Water supply projects gihangyong mapadali pagtrabaho – Esparcia

Tabangan nato ang mga bag-ong supplier sa panubig nga mapadali ang ilang water supply projects aron masolosyonan ang problema sa supply sa panubig dinhi sa syudad.

Mao kini ang panawagan ni Konsehal Bernie Esparcia atol sa sesyon sa konseho niadtong Lunes nga gidumala ni Bise Mayor Bebot Rodriguez, human iyang nadawat ang molo sa katawhan gikan sa lain laing barangay sa dakbayan nga adunay problema sa panubig.

Iyang gibutyag nga daghan gayud nga mga barangay ang walay igong supply sa tubig ug matod pa, ang nakahasol kay kasagaran gabii o’ kadlawon na moagas sulod sa limitado pa nga oras apan nagpabiling dagko ang ilang mga balayronon.

Hinuon, nalipay si Konsehal Bernie tungod sa pagsulod sa mga bag-ong water suppliers kay hinay-hinay nga naserbisyohan ang katawhan sa pipila ka mga barangay ug basin mao kini ang solusyon sa maong problema.

Apan, ang iyang gikahingawa kay adunay mga barangay nga langan ang pagpasaka sa gikinahanglang resolosyon nga magsuporta sa ilang mga proyekto.

Dugang niini, giingon nga adunay mga subdivision nga gahulat na ang homeowners apan tungod kay wala pa ang panugot gikan sa CHUDD gawas pa sa giingong kataas sa balayronon sa excavation fee nga matod pa mas mahal pa sa presyo sa mga tubo nga ilang i-instalar.

Niini, ang konseho miaghat nga mapadali ang pagtrabaho sa mga water supply projects dinhi sa syudad sa tinguha nga maabagan ang katawhan sa ilang problema sa kakulangon sa panubig.