Wagtangon na ang tipping fee sa kabalayan sa gisugyot nga Environmetal Code-Salcedo

WALAON na ang tipping fee nga pagabayran sa mga kabalayan sa mga basura nga

ilang gilabay sa sanitary landfill kon mapasa na ang Environmental Code sa syudad.

Kini ang gibutyag ni Konsehal Salcedo, Chairman sa komite sa Environment and Natural Resources, sa sesyon niadtong Lunes nga gidumala ni Bise Mayor Kikang Uy agig reaksyon sa special report ni Konsehal John Micheal Seno nga nakadawat siyag reklamo sa pipila ka subdivision mahitungod sa pagpabayad nila sa tipping fee.

Gani, gikwestyon pa ni Salcedo nganong pabayron pa ang subdivision sa tipping fees nga kompleto man ang ilang gibayaran nga buhis sama nalang sa Real Property Tax (RPT) ug nganong dili man sila sudlan sa IPM, ang gakolekta sa basura sa syudad.

Gipasabot usab sa konsehal nga kompleto man ang koleksyon sa basura sa kabarangayan apan ang mga subdivision ga hire pa sila’g private garbage collector nga mokolekta ug molabay sa ilang mga basura kay diman sila gasudlan sa IPM.

Hinoon gipasalamatan ni Salcedo ang City Local Environment and Natural Resources (CLENRO) kay nag-implement na og waste segregation ang 40 ka barangays og sa maong paagi mokunhod na ang gidaghanon sa basura nga makolekta.

Malaumon si Konsehal Salcedo nga kon mapatuman na ang Environmental Code hamugaway na ang dagan sa pagkolekta sa basura sa tibuok syudad.