VM Rodriguez misugyot pagpasabot sa mapaakan sa iro

“IMPORTANTE kaayo ang pag-eksplikar ngadto sa usa ka pasyente nga mapaakan sa iro kay wala silay hinanawan sa unsay iyang dangatan karon, ugma ug sa umaabot pang mga adlaw kun dili siya ma-injectionan sa vaccine.”

Kini ang gibutyag ni Bise Mayor Bebot Rodriguez atol sa sesyon sa Konseho niadtong Lunes human si Konsehal Bernie Esparcia mitaho kabahin sa usa ka pasyente nga napaakan sa laawng  iro nga giingong gibalibaran sa buhatan sa City Health og  gipabalik  sa sunod pang mga adlaw. Mibutyag  ang bise mayor nga ang vaccine sa rabies  sa buntag ra gyud angay  itupok ngadto sa usa ka pasyente nga mapaakan sa  aron mabal-an pa kon adunay  reaksyon sa tambal.

Hinoon, gipadayag usab sa bise mayor nga daghan siyag nadawat nga mga reklamo kabahin sa giingong  dili maatiman diretso sa ilang pag-anha sa  maong buhatan.

Niini, si Bise Mayor Rodriguez misugyot nga unta mapasabot gayud og sakto ang mga  pasyente aron  dili usab sila mataranta o mabalaka.