VM Bebot nangusog mapanas pagkolekta og tipping fee sa mga subd, homeowners

ANGAYANG mahunong na ang pagkolekta og tipping fee sa mga homeowners ug subdivision nga maoy nangunay og pagkolekta ug labay sa ilang mga basura diha sa sanitary landfill.

Kini ang gipadayag ni Bise Mayor Bebot Rodriguez atol sa tigom sa komite sa environment and natural resources sa milabayng adlaw nga gidumala ni Konsehal Roger Abaday.

Ang bise mayor mipresentar sa iyang sugyot ordinansa nga nag-amendar sa Section 27 sa Ordinance No. 13378-2018 kon Integrated Ecological Solid Waste Management of Cagayan de Oro City nga nagpahamtang og tipping fee sa mga homeowners ug subdivision nga maglabay sa ilang basura diha sa landfill.

Dili makatarunganon nga kolektahan og tipping fee ang mga homeowners o’ subdivision nga nangunay sa pagkolekta sa ilang mga basura nga walay gasto ang kagamhanan, dugang ni Bise Mayor Rodriguez.

Sa Section 219 sa 2015 Revenue Code, nakalatid nga ang tanang pribadong kapunungan o’ establisamento nga boluntaryong molabay sa ilang mga basura gamit ang ilang kaugalingong salakyan dili na pagakolektahan sa tipping fee samtang ang Section 27 sa Ordinance No.13378-2018 nagmando sa pagkolekta og tipping fees sa tanang private haulers o’ indibidwal nga molabay sa basura dinha sa landfill.

Gipasabot usab sa bise mayor nga nagsumpaki ang probisyon sa duha ka ordinansa hinungdan nga angayan nga wad-on na ang pagpahamtang sa tipping fees kay nakahatag kini og dugang pas-anon sa katawhan.

Angayan lang pahalipayan ug hatagan sila sa malungtaron nga insentibo tungod sa ilang pagkolekta ug pagdumala sa basura nga walay gasto ang syudad, pamahayag sa bise mayor.

Sa iyang bahin, si Engr. Armen Cuenca sa City Local Environment and Natural Resources (CLENRO) mikompirmar nga nag-implementar ang syudad sa pagkolekta sa tipping fee niadtong Enero, ning tuig apan gisuspende na sugod niadtong Marso 2022.

Niini, si Abaday mipadayag sa iyang dakong suporta sa lakang nga ma-amendar ang ordinansa alang sa maong katuyuan.