VM BEBOT NANGUSOG MAPALIG-ON DIHAS MGA BRGY PAGPATUMAN SA VAWC LAW

KINAHANGLAN atong palig-onon ang pag-abag sa kababaehan ug kabataang biktima sa mga bisan unsang matang sa pang-abuso pinaagi sa paghatag og gahum sa mga opisyal sa barangay dinha sa pagpatuman sa probisyon sa RA 9262 kon Violation Against Women and Children (VAWC).

Kini ang pamahayag ni Bise Mayor Bebot Rodriguez atol sa sesyon sa konseho niadtong Lunes agi’g reaksyon sa panawagan ni Konsehal Imee Moreno nga ma-institutionalize ang paghatag sa honorarium sa VAWC desk officers tungod sa kadako sa ilang gitunol nga serbisyo ngadto sa katawhan ilabina sa mga biktima sa VAWC.

Matod sa bise mayor nga strikto kaayo siya sa iyang panahon nga kapitan sa Barangay Nazareth pero ang gakahitabo mapasayloon man ang asawa ug kanunay nga mopasaylo sa bana. Busa, magbalik-balik kini nga kaso ang VAWC sa kada barangay.

Siya midugang nga kasagaran sa kababaehan nga biktima sa pang-abuso sa mga bana dili kabalo unsay buhaton, asa sila magpaingon ug kung maprotektahan ba ang ilang katungod.

Mapasalamaton ako sa mga VAWC desk officers sa ilang kaikag dinha sa pagsilbi sa mga biktima apan gikinahanglan nga matabangan gayud sila sa mga opisyal sa barangay, sumpay sa bise mayor.

Niini, malaumon si Bise Mayor Bebot Rodriguez nga mahisgutan sa kapunungan sa mga barangay pinaagi ni Konsehal Alam Lim ang pagpatuman sa hingpit sa gahum nga gihatag sa balaod ngadto sa mga kapitan ug pagtuki sa mamahimong responsibilidad sa uban pang opisyal sa barangay aron maabagan ang mga VAWC desk officers o’ volunteers sa tinguha nga mabuhi ang mandato sa balaod ug mapalig-on ang programa pagproteher sa katungod sa kababaehan ug kabataan sa matag barangay.