VM Bebot nagtoong malinawon ang CDO

Hugot ang pagtoo ni Bise Mayor Bebot Rodriguez nga nagpabiling malinawon ang Cagayan de Oro City. Mao kini ang iyang giluwatan atol sa sesyon sa konseho niadtong Lunes human si Konsehal Yvy Emano mitaho sa pipila ka mga panghitabo sa krimen dinhi sa syudad bag-ohay lang. Matod niya nga padayon siyang nag-agni sa mga langyaw nga mobisita sa dakbayan tungod kay usa kini ka malinawon nga lugar. Siya mibutyag sa iyang paninguha nga mapalambo ang ekonomiya sa syudad ug nga adunay pagkaon sa ilang mga lamisa matag adlaw ang mga Kagay-anon.

Gani, siya midugang nga matag inagurasyon nga iyang matambongan dako ang iyang pasalamat sa mga tag-iya sa establisamento sa walay puas nga pag-abag sa kagamhanan dinha sa paghatag og pagkaon sa mga kawani pinaagi sa pagtunol og dugang mga trabaho.

Iyang gibutyag nga ang maong panghitabo panalagsa lang ug dili gayud basihan sa kahimtang sa kahusay ug kalinaw sa syudad. Timaan niini, siya midugang nga ang Peace and Order Security Council, diin siya ang vice chairman, kanunay gayud nga nagplano aron matubag ang mga hulga sa kahusay ug kalinaw.

“Nahitabo lang nga sunod sunod ang panghitabo. Seguro ang gikahanglan mao ang pagpatuman sa dugang pang mga lakang kauban sa kwerpo sa kapolisan sa tinguha nga hingpit nga mamintinar ang kahusay ug kalinaw sa syudad,” pamahayag ni Bise Mayor Bebot Rodriguez.