VM Bebot misuporta pagdeklara sa CDO nga mining-free zone

Si Bise Mayor Bebot Rodriguez padayong naninguha nga maprotektahan ang kinaiyahan sa dakbayan sa Cagayan de Oro.

Kini human giduso sa bise mayor ang sugyot resolosyon nga magpadayag og suporta sa gipasakang House Bill No. 967 ni Kongresman Rufus Rodriguez nga magdeklara sa dakbayan sa Cagayan de Oro nga mining-free zone.

Iyang gipasabot nga ang dakbayan nahiagom na og flash floods ug usa sa mga hinungdan sa maong kalamidad ang padayong operasyon sa pagmina sa lain laing bahin sa syudad. Siya midugang nga adunay kaakuhan ang tanan ilabina ang gobyerno sa pagpatuman sa mga lakang nga maprotektahan ang katawhan ug ang kinaiyahan gikan sa makadaut nga epekto sa pagmina.

Malaumon ang bise mayor nga pinaagi sa maong balaodnon mapalapdan ang programa pagproteher sa kinaiyahan ug sa katawhan sa dakbayan. Ang sugyot resolosyon nga giduso ni Bise Mayor Bebot Rodriguez gipaabot konsiderahon sa komite sa environment ni Konsehal Roger Abaday.