VM Bebot misugyot matrabaho sa brgy paglimpyo sa mga kanal

Sa akong panahon isip kapitan sa Barangay Nazareth permi gayud ako maghangyo sa buhatan sa City Engineer’s sa paglimpyo sa mga kanal aron makuhaan ang kahugaw sa kadalanan.

Kini ang pamahayag ni Bise Mayor Bebot Rodriguez atol sa sesyon sa konseho niadtong Lunes agig reaksyon sa taho ni Konsehal Yvy Emano kalabot sa pipila ka mga barangay nga napasagdan nga abli ang ilang mga kanal nga posibleng magdala og peligro sa katawhan ilabina panahon sa ting-ulan.

Matod ni Rodriguez nga mahimo usab nga ipaabot kini nga problema ngadto sa asosasyon sa Liga ng mga Barangay ubos ni Konsehal Yan Lam Lim aron paghatag og katakus sa tanang barangay nga sila mismo ang maglimpyo sa mga kanal ilabina kun ginagmay lang ug makaya sa ilang pundo tungod kay responsibilidad sa matag barangay nga mamintanar ug maseguro ang kalimpyo.

Niini, gitahasan ni Rodriguez ang komite sa public works ni Konsehal John Michael Seno paghimo og pakisusi uban sa buhatan sa Department of Public Works and Highways (DPWH) sa hinungdan nga napasagdan nga abli ang mga drainage sa pipila sa barangay sa syudad.