VM Bebot misugyot mapahigayon Tsada Oro Film Fest (TOFF)

SI Bise Mayor Bebot Rodriguez naninguha nga mapalambo ang film industry sa dakbayan sa Cagayan de Oro.

Kini ang unod sa gidusong sugyot ordinansa sa bise mayor nga mag-institutionalize sa Creative Industry pinaagi sa pagmugan sa Tsada Oro Film Academy ug pagpasiugda sa tinuig nga Tsada Oro Film Festival (TOFF) sa dakbayan.

Tinguha niini nga mahatagan sa kahigayonan nga mapromote ang lokal nga industriya sa pelikula nunot sa probisyon sa 1987 Constitution nga nagmando sa gobyerno paghatag og prioridad sa edukasyon, siyensya ug teknolohiya, pag-arte, kultura ug paugnat sa kusog nga mag-aghat sa patriotism ug nasyonalismo alang sa kalamboan sa matag tawo.

Sa maong sugyot balaodnon, mamahimong palisiya sa lokal nga kagamhanan ang pagpasundayag sa local film industry pinaagi sa pag-ila sa mga tighimo’g pelikula sa syudad.

Ang bise mayor midugang nga kaakuhan sa gobyerno ang pagsuporta, pagpreserba ug pagpalambo sa industriya sa pelikula ilabina nga naghulagway kini sa kalamboan sa kultura, kasaysayan ug katawhan sa dakbayan.

Ang sugyot ordinansa ni Bise Mayor Bebot gipaabot tukion sa komite sa turismo ni Konsehal Jay Pascual alang sa dugang pagtuon ug rekomendasyon.