VM Bebot misugyot mamugna ruta sa PUVs paingon sa Oro reloc sites

Walay gapamuyo sa atong mga relocation sites tungod kay walay transportasyon o’ ruta sa pampublikong sakyanan paingon didto.

Mao kini ang gibutyag ni Bise Mayor Bebot Rodriguez atol sa sesyon sa konseho niadtong Lunes human si Konsehal Edgar Cabanlas mitaho sa namatikdang anomaliya dinha sa City Housing and Urban Development Department (CHUDD).

Usa sa gitumbok sa bise mayor mao ang relocation sites dinha sa barangay Lumbia. Matod niya nga walay gusto marelokar sa dapit taliwala nga aduna nay mga balay nga natukod tungod kay walay masakyan paingon didto, walay nagruta nga sakyanan.

Nganong manghatag kita og relokasyon nga wala ganiy transportasyon paingon sa dapit. Unta ang atong mga relocation sites accessible sa katawhan ilabina nga lagyo kini sa sentrong bahin sa syudad, dugang ni Bise mayor Rodriguez.

Daghan na ang natukod apan nangaguba na lang taliwala nga daghan ang gapangayo tungod kay walay gusto modawat gumikan sa kakulangon sa transportasyon ug kini ang usa sa mga lakang nga angayang matubag sa pagpanday sa bag-ong balaod kalabot sa pag-apod apod sa mga housing units sa relocation sites sa syudad, panapos ni Bise Mayor Bebot Rodriguez.