VM Bebot mihangyong mapanumbalik curfew hours sa Cagayan de Oro

HUGOT ang panawagan ni Bise Mayor Bebot Rodriguez nga mapanumbalik ang pagpatuman sa curfew hours dinhi sa dakbayan sa Cagayan de Oro.

Kini ang gipadayag sa bise mayor atol sa sinemanang pagpakayab sa nasudnong bandila sa City Hall kagahapon human sa sunod sunod nga mga panghitabo sa krimen dinhi sa syudad.

Subo kaayong palandungon ang mga panghitabo ug gumikan niini gitugkan na sa kabalaka ug kahadlok ang mga ginikanan sa posibleng sangputan kun dili kini mapakgang, pasabot ni Rodriguez.

Sama kanako dili sayon ang gibating kahadlok sa mga ginikanan matag gabii alang sa ilang mga anak maong akong hangyo sa atong mayor nga unta mapanumbalik gayud ang curfew hours, dugang sa bise mayor.

Ang pagpatuman sa curfew hours maoy usa sa nakitang solosyon nga mamintinar ang kahusay ug kalinaw sa dakbayan, panapos ni Bise Mayor Bebot Rodriguez. (SP/JNortiza)