VM Bebot mihagit sa saktong datos sa mga benepisaryo sa DSWD, CSWD

KANUS-A man nato makuha ang gikinahanglang datos sa mga mahimong benepisaryo sa mga programa sa DSWD ug CSWD?

Mao kini ang hagit ni Bise Mayor Bebot Rodriguez atol sa sesyon sa konseho niadtong Lunes human gidapit si DSWD-10 regional director Ramel Jamen aron paghatag og dugang kasayuran sa gipatumang financial educational assistance.

Dako akong pasalamat sa gitunol nga ayudang pinansyal sa DSWD apan hangtod kanus-a man mag-antos ang katawhan dinha sa paglinya aron makuha ang maong ayuda? Daghan kaayo ang naglinya ug gani, nagkagubot pa ang mga benepisaryo, pamahayag sa bise mayor.

Gusto nako masayran ang datos sa mga benepisaryo gikan sa bukid bukid nga mga barangay sa syudad. Unsaon man nila pagpahimulos sa programa nga ang pagrehistro online man ug kasagaran kanila walay internet connection?, pangutana ni Bise Mayor Bebot.

Matod niya nga dili mahimong kanunay na lang magkonsiderar ang dakbayan sa kakulangon sa mga ahensya sa gobyerno tungod kay adunay mga lakang nga posibleng mapatuman aron hapsay nga matunol ang serbisyo.

Makadismaya gayud ang mga panghitabo tungod kay daghan kaayo ang nahikawan sa kahigayonan gumikan sa kakulangon sa mga tigdumala sa mga ahensya sa gobyerno, panapos ni Bise Mayor Bebot Rodriguez.