VM Bebot miawhag masoloyonan problemang dala sa quarry trucks

KINAHANGLANG mapangitaan sa pamaagi nga masolosyonan ang mga problemang dala sa mga trak nga gakarga og balas ug grabas.

Kini ang panawagan ni Bise Mayor Bebot Rodriguez atol sa sesyon sa konseho niadtong Lunes human si Konsehal John Michael Seno mitaho kalabot sa posibleng hinungdan sa daghan nga lubak lubak sa kadalanan.

Ang bise mayor mibutyag sa iyang namatikdan sa panahon nga siya kapitan pa sa barangay Nazareth nga ga-overload gayud ang mga trak. Gani, matod niya, ang mga tagak tagak nga sand and gravel dili galimpyohan sa mga nanag-iya sa trak o’ sa hauler ug ang barangay pa ang galimpyo.

Didto usab sa bukid nga mga barangay, akong naobserbahan nga sulod sa 30 minutos, mokabat sa 20 ka trak ang gabalik balik og hakot nga nagdala usab sa kaabog dili lang sa kadalanan kun dili sa tibouk palibot, dugang ni Bise Mayor Bebot.

Siya nanawagan nga angayan usab nga lantawon ang maong suliran tungod kay nagdala og sakit sa mga molopyo sa dapit ang pagbalik balik sa abog. Daghan na ang nagsakit og asthma sa mga nanimuyo sa bukid bukid nga mga barangay diin adunay mga kalihokan sa quarry ug uban kanila naanad na sa abog.

Ato gayud kining dalion aron matubag ang mulo sa katawhan ug mapangitaan sa pamaagi nga mapreserba ang kalig-on sa kadalanan sa dakbayan.