VM Bebot miaksyon sa hangyo sa taga-Apovel

GIDUSO ni Bise Mayor Bebot Rodriguez ngadto sa komite sa subdivision and landed estate ni Konsehal Edgar Cabanlas ang hangyo sa Apovel Lot Owners, Residents and Homeowners Association, Inc. (ALRHOAI) aron matun-an ug mahimo ang tukmang rekomendasyon.

Ang mga sakop sa kapunungan mihangyo nga ma-rekonsiderar ang gipalabang nga Ordinance No. 14405-2022 sa konseho sa syudad tungod kay matod pa wala sila makonsulta ug wala mapresentar atol sa gipahigayong mga tigom sa konseho ang nahisgotang lakang.

Giingon nga wala usab sila makonsulta sa lakang pagtukod og State of the Art Stadium ug sa proyekto sa lokal nga kagamhanan nga City Tennis Center dinha sa Apovel Plaza.

Dugang gipasabot nga dako ang epekto sa gilaraw nga proyekto sa kapaseguroan, kalinaw ug kinabuhi sa mga residente sa dapit gawas pa nga makadugang usab kini sa kapiot sa dagan sa trapiko sulod sa subdivision.

Mahinumduman nga sa milabayng tuig, ang konseho sa syudad mipalabang sa ordinansa nga nagpanas sa Ordinance No. 14015-2021 nga naghatag og katungod sa ALRHOAI pagdumala sa ilang open spaces ug uban pang fasilidad sa Apovel Subdivision ug naghatag sa katungod sa mayor paglagda og Memorandum of Agreement tali sa kapunungan alang sa maong katuyuan.

Apan sa gilaraw nga pagtukod og state-of-the-art covered stadium dinha sa open spaces sa subdivision, gikinahanglan nga mapanumbalik sa kagamhanan sa dakbayan ang pagdumala niini, hinungdan nga gipalabang ang maong ordinansa.