Utlanan sa Alae-Phividec bypass road gihingusgan nga masuta

GIHINGUSGAN ni Konsehal James Judith, Chairman sa Komite sa Arbitration, nga masuta ang utlanan nga nagdugtong sa dalan sa Alae-Tagoloan, Misamis Oriental ug Manolo Fortich, Bukidnon.

Basi sa geographical coordinates sa Department of Environment and Natural Resources-Region 10, adunay parte sa maong dalan nga nasulod sa jurisdiction sa Dakbayan sa Cagayan de Oro ug kini adunay gitas-on nga 698.4 metros, matod ni Konsehal Judith sa iyang special report atol sa sesyon niadtong Lunes nga gidumala ni Bise Mayor Bebot Rodriguez.

Sumala sa konsehal nga mas sayon sa mga motorist gikan sa lalawigan sa Bukidnon ang pag-agi sa maong dalan kon ang ilang destinasyon mao ang este nga bahin sa Misamis Oriental gumikan kay dili naman sila monaog sa Barangay Puerto. Adto na sila moagi sa Matibugaw lahos sa Natumulan, dugang ni Konsehal Judith.

Gilantaw ni Judith nga mahimong kabahin kini sa paglambo sa ekonomiya sa dakbayan. Subay niini, gisugyot ni Konsehal Judith nga masabwag kini nga impormasyon sa tanang opisina sa City Hall.

Ang maong report giduso ni Bise Mayor Bebot Rodriguez ngadto sa Komite sa Arbitration alang sa dugang pagtuon ug rekomendasyon.