TWG gimugna aron matukod Triple A slaughterhouse sa CDO

SA tinguha nga matukod dinhi sa dakbayan sa Cagayan de Oro ang usa ka Triple A nga matansahan, ang komite sa social services ni Konsehal Girlie Balaba mimugna og Technical Working Group (TWG).

Kini human si Konsehal Ian Mark Nacaya mibutyag nga sa niaging mga tuig adunay plano ang Department of Agriculture (DA) nga motukod sa maong facilidad apan matod pa wala pa gayud mahatagan sa katumanan hangtod karong panahona.

Gani, matod niya, adunay gitagana ang dakbayan nga luna dinha sa barangay Balubal aron tukuran sa maong facilidad.

Niini, ang gimugnang TWG gitahasan nga mag-koordinar sa DA aron mapangitaan sa pamaagi nga matukod ang maong Triple A slaughterhouse facility.

Ang maong TWG gilangkoban sa mga representante sa Oro Chamber, National Commission on Muslim Filipinos, Office of Muslim Affairs, CSWD, City Administrator’s Office ug City DILG.

Malaumon ang komite ni Balaba nga pinaagi sa panagtambayayong sa lokal ug nasyonal nga mga ahensya matukod na ang gilantawng facilidad aron mapatuman usab ang sugyot ordinansa nga magmugna sa matansahan alang sa mga halal products.