Tukmang konsultasyon sa mga mangingisda gisugyot ni Konsehal Achas

KON adunay mga programa ang kagamhanan nga ipatuman naa gyud untay saktong konsultasyon gikan kanilang mga mangingisda sa dakbayan.

Kini ang hangyo ni Konsehal Christian Rustico Achas atol sa miaging hiniusang tigom sa iyang Komite sa Fisheries and Aquatic Resources ug sa Komite sa Agriculture ni Konsehal Jay Pascual.

Kini nagtuki kabahin sa P2 milyones nga ganti  gikan sa programa sa Bureau of Fisheries and Aquatic Resources nga Malinis at Masaganang Karagatan (MMK).

Gitin-aw ni City Agriculturist Paterno Gonzales, Jr. nga ang MMK award gihatag sa kagamhanan sa dakbayan tungod sa programa nga gisumiter.

Gikan sa P2 milyones aduna nay gipangpalit nga mga kahimanan sama sa 20 ka makina sa pagpangisda, 6 ka freezer, mga fish hook ug uban pa, ug ang pag-apod-apod sa maong mga items unahon paghatag sumala sa panginahanglanon sa asosasyon ug diskresyon sa kagamhanan human gihimo ang tukmang pag-evaluate sa mga benepisyaryo niini.

Niini si Konsehal Achas kusganong mihangyo sa buhatan sa City Agriculturist nga sa umaabot nga mga programa alang sa mga mangingisda, angayan makonsulta sila kalabot sa ilang mga panginahanglanon.