Tribal Justice System suportado ni Kon Cabaring

ANG tumong sa pagbaton og Indigenous Peoples Mandatory Representative (IPMR) sa syudad mao nga matun-an, masabtan ug mabalanse ang duha ka balaod-- ang Indigenous Peoples’ Right Act of 1997 (IPRA Law) ug ang Local Government Code of 1991 (RA 7160).

Kini ang pamahayag ni Konsehal Roberto Cabaring, Chairman sa Komite sa Cultural Communities, samtang iyang gipasalamatan si Konsehal James Judith sa iyang special report atol sa sesyon niadtong Lunes nga gidumala ni Bise Mayor Bebot Rodriguez kalabot sa pagpalabang sa ordinansa nga magtukod og Tribal Justice System alang sa mga lumad dinhi sa dakbayan.

Kay kini na ang higayon nga mabati, mailhan ug marespeto ang tradisyon ug kultura sa mga lumad sukad pa sa katigulangan, dugtong ni Konsehal Cabaring.

Iyang gipasabot nga suportado niya ang maong lakang sa paghimo og tribal justice system kay kon adunay manumbong mas maayo dalhon ngadto sa IP nga hukmanan pero depende usab kini sa kasabotan sa Barangay Lupon ug sa konseho sa barangay, ug kun dili mahukman ayha kini ipasaka ngadto sa taas nga hukmanan.

Niini, dako ang paglaum ni Konsehal Cabaring uban sa pag-abag sa mga hintundang buhatan sa city hall nga mahatagan kini sa tukmang pagtuon ug rekomendasyon.