Tribal justice system alang sa IPs hisgotan sa komite ni Cabaring

HISGOTAN sa Komite sa Cultural Communities ni Konsehal Roberto Cabaring atol sa tigom karong umaabot Agosto 16, sa may alas 9:30 sa buntag diha sa hawanan sa konseho ang sulat reklamo sa Nahilaran Dansolihon Tribal Council ug Clan Representatives (IPs) batok ni OIC P.O. NCIP-Misamis Oriental Engr. Archibal Remalig sa pag-validate sa mga lumad sa syudad nga gipangunahan ni Datu Edgardo Butlig.

Tipik usab sa hisgotan ang sugyot ordinansa ni Konsehal James Judith nga magtukod og tribal justice system alang sa mga lumad dinhi sa syudad.

Subay niini, gidapit sa komite sa pagtambong sa maong tigom  aron madungog ang ilang mga hunahuna ug opinyon sila si City Administrator Atty. Hilario Raagas, NCIP Regional Director Fundador Binahon, NCIP Legal Officer Atty. Dexter Precioso ug Acting NCIP Provincial Officer Engr. Archibal Remalig.

Gipaabot usab nga motambong sa tigom sila si Konsehal Jay Pascual, Bernie Esparcia, Malou Gaane, James Judith, II, Edgar Cabanlas, Christian Rustico Achas ug Bise Mayor Rodriguez.