Transparency, full disclosure sa tanang transaksyon sa City Hall gihingusgan

GIHINGUSGAN karon ni Konsehal Jose Pepe Abbu Jr. nga mahatagan sa libreng kahigayonan ang katawhan nga makabaton og kopya sa mga opisyal nga record ug

dokumento nga naglambigit sa pampublikong interest.

Kini ang unod sa sugyot ordinansa nga giduso sa konsehal nga naghan-ay sa pagsagop og mga pamaagi alang sa libreng access sa tanang transaksyon sa lokal nga kagamhanan subay sa katungod nga gihatag sa batakang balaod.

Gipasabot ni Abbu nga adunay katungod ang katawhan nga masayod sa mga transaksyon sa City Hall subay sa Section 27 ug 28 sa Artcile II ug Section 7, Article III sa 1987 Philippine Constitution.

Ubos sa maong sugyot, gitahasan ang buhatan sa City Information Office (CIO) nga maoy magdumala sa pagpatuman sa ordinansa ingon man magpili ug magdestino sa mga gikinahanglang personnel.

Niini, ang interesadong makakuha og impormasyon kinahanglang mosumete og hangyo sa CIO ug ang matag kopya nga makuha walay bayad ug paga-aksyonan sa labing daling panahon ug dili molapas sa 15 ka adlaw.

Ang gidusong sugyot ordinansa ni Abbu gipaabot tun-an sa komite sa pamalaod ni Konsehal Ian Mark Nacaya. (SP/JNortiza)