Traffic management dihas mga tunghaan gisugyot nga ma-review

GIHINGUSGAN ni Konsehal Bernie Esparcia nga mahatagan sa hingpit nga seguridad ug kapasiguroan ang mga tinun-an labina nga ipatuman na ang Face-to-Face classes dili madugay.

Sa iyang special report atol sa sesyon sa konseho niadtong Lunes nga gidumala Presiding Officer Protempore Konsehal Edgar Cabanlas, si Konsehal Esparcia mibutyag nga segun sa pagtoon nga gihimo sa (UNICEF) United Nation Childrens Fund adunay tulo ka bata ang gakamatay matag adlaw tungod sa aksidente sa dalan.

Angayan kini hatagan sa igong pagtagad tungod kay ang kabataan nagkinahanglan gayud og igong giya diha sa pagtabok sa dalan, dugang sa Konsehal.

Gipasabot sa Konsehal nga daghang mga tunghaan sa syudad nga nahimutang daplin sa mga highway, busa angayan gayod nga adunay presensya sa mga traffic enforcers aron mogiya sa mga estudyante ug sa ingon mahalikay sa aksidente.

Gibutyag usab sa konsehal nga kasagaran gahuot ang dagan sa trapiko panahon sa paggawas ug pagsulod sa mga estudyante, ginikanan, maestra og mga empleyado.

Subay niini, gisugyot ni Konsehal Esparcia nga ma-review ang traffic management atubangan sa mga tunghaan labina niadtong ana-a nahimutang duol sa mga highways ug sa mga dapit nga labihan ka gubot ang dagan sa trapiko alang sa kaluwasan sa kabataan sa syudad.