Tigom sa Klarex nga Serbisyo sa Kable Task Force gitambongan ni Abaday

WALA mipakyas sa pag-apil si Konsehal Roger Abaday sa binulang miting sa Task Force 'Klarex Nga Serbisyo Sa Kable' sa dakbayan nga gipahigayon niadtong Marso 13 ning tuig sa Seven Seas Water Park, Opol, Misamis Oriental.

Tipik sa gituki atol sa maong tigom ang pagpalig-on sa koordinasyon tali sa mga telecommunication companies sama sa Globe Telecom, Smart-PLDT, DITO, ug sa Department of Public Works and Highways alang sa pagpalapad sa mga dalan.

Nahisgotan usab ang accomplishment report sa maong task force bahin sa pagpanghipos sa mga spaghetti wires kon mga kable sa kuryente nga nakahatag kahugaw, purwisyo, ug kadelikado sa kaladanan.

Giplanohan usab sa task force ang mga lakang sa pagpalambo sa mga programang may kalabotan sa Information and Communications Technology sa dakbayan.

Mahinumduman nga ang Konseho sa Syudad hiniusang mipasidungog sa Task Force 'Klarex Nga Serbisyo Sa Kable' kinsa nanguna sa pagpanghinlo ug pagtangtang sa mga spaghetti wires nga nagbitay sa mga poste sa kadalanan. (FDCalotes/SP/Photos from Councilor Abaday's FB page)