TF magtuon sa doluna tali’s CDO, Iligan gimugna

GIMUGNA sa Komite sa Arbitration ni Konsehal James Judith ang usa ka task force (TF) nga tahasan sa pagpahigayon og dugang pagtuon sa doluna tali sa dakbayan sa Cagayan de Oro ug Iligan. Kini human nagtigom ang komite sa milabayng semana ug nasabutan nga ilang dawaton ang rekomendasyon sa task force basi sa mga dokumento nga gihawiran sa mga hintungdang ahensya sa gobyerno.

Lakip sa mga doluna nga tun-an mao ang barangay Besigan, Tignapoloan ug Dansolihon nga subay sa Codified Ordinance of 1994 nahisakop sa Cagayan de Oro. Sa iyang bahin, si Iligan City Councilor Betsy Maria Zalsos namahayag nga adunay mga dapit nga giingong nahisakop sa Iligan apan wala masuportahi sa ilang kagamhanan tungod sa kalisod sa dalan apan naatiman sa kagamhanan sa Cagayan de Oro.

Sa nasabutan, ang matag panig magpadala og representante ngadto sa task force uban sa representante sa National Economic Development Authority (NEDA) ug DENR ug kini mag-abag sa pagtino sa mga dokumento gikan sa DENR nga mohaum sa mga dokumento sa Land Management Bureau (LMB).

Ang representante sa DENR namahayag nga adunay masterlist sa mga doluna sa mga syudad ug munisipyo ug angayang masayod ang kadagkoan sa mga lokal nga kagamhanan sa ilang mga tukmang doluna subay sa maong masterlist.