Libreng technical vocational courses gitanyag sa CDO City College - Suzette nag-aghat sa kabatan-onan pagpahimulos sa programa

SI Konsehal Suzette Magtajas-Daba, Chairman sa Komite sa Edukasyon, mipahibalo nga nagsugod na pagdawat og mga enrollees alang sa Technical Vocational Courses ang City College of Cagayan de Oro –Technical Skills and Technology Institute (TSTI).

Lakip sa mga kursong gitanyag alang sa unang quarter sa 2024 Academic Year 2024 mao ang Electrical, Installation and Maintenance (EIM) NCII, Shielded Metal Arc Welding (SMAW) NC1 ug Housekeeping NCII. Nasayran nga ang klase sa maong mga  kurso magsugod sa Enero 15, 2024.

Niini, giaghat ni Konsehal Daba ang mga batan-on ilabina ang mga out of school youth (OSY) nga nag-edad og 18 anyos pataas nga magpahimulos sa maong libreng programa nga gitanyag sa gobyerno kay magdala kini og dugang kalamboan sa ilang kinabuhi.

Alang sa dugang impormasyon, mahimong mobisita ang mga interesado diha sa TSTI sa Barangay Agusan o’ motawag sa mobile number 09361208946.