Suzette subling miaghat sa OSY sa pag-apply sa RISE-TVET Scholarship Program

SUBLING giaghat ni Konsehal Suzette Magtajas-Daba, chairman sa Komite sa Edukasyon, ang tanang kwalipikadong kabatan-onan sa pag-apply sa Relevant Industry Skills for Employment -Technical Vocational Education Training (RISE-TVET) scholarship program.

Atol sa programang Inyong Konseho Karon, gipasabot ni Daba nga gilugwayan ang pagpangdawat sa mga aplikasyon hangtod Oktubre 31, ning tuig.

Nasayran nga aduna lamay 186 nga kwalipikadong nag-apply.

Giklaro sa konsehal nga ang kagamhanan migahin og pundo alang sa 500 nga kwalipikadong kabatan-onan nga walay trabaho nga nag-edad og 18 anyos pataas, residente sa syudad, migradwar sa Junior High School, wala pa nakapahimulos sa mga scholarship program sa syudad ug wala na-enrol, nabagsak, o miatras sa bisan unsang TVET scholarship program.

Mahinumdoman nga ang (RISE-TVET) program gilunsad niadtong bulan sa Agosto dungan sa pagbukas sa ‘Kahigayonan 2024: UY!portunidad para sa Kabatan-onan ‘Skills Training Expo and Job Fair’ diha sa Centrio Ayala Mall, ning syudad.

Niini, siya subling nanawagan sa mga ginikanan ug mga interesadong kabatan-onan nga mag-apply online pinaagi sa link: bit.ly/RISETVETApply2024.

Alang sa dugang detalye ug impormasyon, iyang giagni ang mga interesado sa pagbisita sa FB page sa CdO City Scholarships Office ug mahimong motawag sa numero 0929-819-0819.