Suzette nag-aghat sa kabataan pag-apply sa 2024 City Scholarship Program

SI Konsehal Suzette Magtajas-Daba, Chairman sa Komite sa Edukasyon, mipahibalo nga nagsugod gahapong adlawa, Pebrero 5, 2024, ang pagdawat sa aplikasyon alang sa 2024 City Scholarships Program nga molungtad hangtod sa Marso 4, 2024.

Matod ni Daba nga ang kagamhanan migahin og P320 milyones karong tuiga alang sa programa ug sa kasamtangan adunay 9,053 ka mga batan-ong iskolar sa dakbayan.

“Dako kini kaayo nga kahigayonan sa tanang mosulod sa unang ang-ang sa kolehiyo kun mapili silang benepisaryo sa maong programa tungod kay mahatagan gayud sa kahigayon nga makab-ot ang ilang gidamgong kurso,” dugang sa konsehal.

Niini, siya nanawagan sa mga ginikanan ug mga interesadong batan-on  ug kwalipikadong tinun-an nga mag-apply online pinaagi sa link: bit.ly/ISDAApplication2024 sugod sa alas 8:00 sa buntag hangtod sa alas 5:00 sa hapon.

Nagpahinumdom usab ang konsehal nga gikinahanglan kompletohon gyud ang ilang mga rekisitos aron makakuha sa qualifying exams. Alang sa dugang detalye ug impormasyon, iyang giagni ang mga interesado sa pagbisita sa FB page sa CdO City Scholarships Office.