Suzette misuporta pag-angkon sa dugang kalamboan sa CDO

Hugot ang pagsuporta ni Konsehal Suzette Magtajas-Daba, chairman sa komite sa edukasyon, sa mga programa nga gilantawng naghatag og dugang kalamboan sa dakbayan.

Kini human si Daba mitambong sa miaging 1st Quarter Council Meeting of the Provincial Micro, Small and Medium Enterprise Development Council (PMSMEDC) diha sa Mallberry Suites Business Hotel, Limketkai Complex.

Gihisgutan sa maong tigom ang dagkong kalampusan nga nahimo sa milabayng tuig ug gihan-ay ang prayoridad nga mga proyekto alang karong tuig 2023.

Ang tigom maoy usa sa mga lakang sa pagsiguro sa kalampusan ug pagkab-ot sa mga tumong ug tinguha nga mapatuman sa hingpit ang mga programa ug proyekto nga magdala og dugang kaarangan sa dakbayan.

Dako ang pasalamat ni Daba nga namugna kini nga council nga magpasiugda sa pagpamuhunan ug pag-uswag sa mga gagmay’ng negosyo uban sa kolaborasyon, kooperasyon ug suporta sa mga nagkadaiyang lokal nga kagamhanan ug mga stakeholders.

Niini, nagpasalamat ang konsehal ni DTI Provincial Director Allmer Masillones, Misamis Oriental Governor Peter Unabia ug tanang sakop sa pundok sa makanunayong suporta sa mga programa dala ang paglaum alang sa katumanan sa dugang mga negosyo.