Suzette mipasalamat sa suporta sa DepEd sa hangyo sa DAMOR

GIKALIPAY ni Konsehal Suzette Magtajas-Daba, chairman sa komite sa edukasyon, ang suporta sa Department of Education (DepEd) - Region 10 ubos ni Schools Division Superintendent Cherry Mae Limbaco-Reyes sa hangyo sa Deaf Association of Misamis Oriental (DAMOR), Incorporated. Kini alang sa tinguha nga ma-integrate ang Sign Language sa kurikulum sa mga tunghaan.

Nasayran gikan sa maong buhatan nga ning tuig ting-tungha 2022-2023, adunay 140 ka special education enrollees diha sa 17 ka mga tunghaan sa dakbayan sa Cagayan de Oro diin nahan-ay na ang pagpatuman sa mga panginahanglanon alang sa ilang pagtoon. Gibutyag nga ang maong mga SpEd enrollees naglakip sa 35 ka tinun-an sa City Central School (CS); tag-duha sa Tablon, Pagatpat Elementary School (ES) ug Lapasan National High School (NHS); napulo sa Puerto ES; tag-upat sa Puerto ug Bulua NHS; tulo sa North City CS; tagsa sa Kauswagan CS, Iponan ES ug Balulang NHS, pito sa West City CS; tag-lima sa Bulua NHS ug Lumbia NHS; 27 sa CDO NHS-Junior High; 22 sa CDO NHS-Senior High ug siyam sa Lumbia Central School.

Mahinumdoman nga ang komite sa edukasyon ni Daba ug komite sa social services ni Konsehal Girlie Balaba miduso ngadto sa Local School Board ubos ni Mayor Klarex Uy sa hangyo nga masukip sa programa sa mayor ang paggahin sa igong pundo aron makonsiderar ang pag-empleyo og teacher’s aide/Deaf aide sa matag tunghaan nga nagtanyag og special education.

Nagpasalamat ang konsehal sa DepEd sa paghatag og aksyon sa mga panginahanglon dili lamang sa maong grupo kun dili alang sa tanang mga tinun-an nga adunay kabilinggan sa pandungog ug mga amang dinhi sa dakbayan sa Cagayan de Oro.