Suzette miawhag sa mga ginakanan pag-abag sa ilang mga anak

TABANGAN nato sila hangtod nga makatrabaho ang mogradwar nga mga Iskolar sa Dakbayan (IsDa).

Kini ang panawagan ni Konsehal Suzette Magtajas-Daba, chairman sa komite sa Edukasyon, atol sa Career Expo 2022 dinha sa Ayala Mall, ning syudad kagahapong adlawa.

Ang kalihokan kabahin sa programa nga gimugna sa kagamhanan sa panguna sa buhatan sa CDO City Scholarships Office inubanan sa Job Placement Bureau-Public Employment Services Office (PESO) ug Department of Labor and Employment (DOLE) -Region 10.

Tumong niini nga ang mogradwar nga mga iskolar sa dakbayan ingon man mga nangita og trabaho makasulod gilayon og trabaho ug magmalampuson sa ilang mga piniling career.

Gipasabot ni Konsehal Suzette nga sayang kaayo ang scholarship nga nadawat sa matag iskolar kun dili sila mahatagan sa kahigayonan nga makasulod sa trabaho. No scholar will be left behind, pamahayag ni sa konsehal.

Niini, gipasalamatan ni Konsehal Suzette ang kagamhanan sa dakbayan, CDO City Scholarships Office, DOLE 10, DOLE - Cagayan de Oro City Field Office ug PESO sa dalaygon nga programa alang sa mga Iskolar sa Dakbayan.

Sa maong higayon si Konsehal Suzette nag-agni sa mga ginikanan nga giyahan ang mga anak sa ilang pag-eskwela tungod kay usa kini sa mga paagi nga ilang makab-ot ang gipangandoy nga mga damgo nga makapahaw-as sa kalisod.