Suzette miaghat sa OSY sa pag-apply sa RISE-TVET Scholarship Program

DUGANG kaarangan ang gilantaw’ng matagamtaman sa katawhan sa dakbayan.

Kini human gilunsad bag-ohay pa lamang ang Relevant Industry Skills for Employment -Technical Vocational Education Training (RISE-TVET) scholarship program atol sa pagbukas sa ‘Kahigayonan 2024: UY!portunidad para sa Kabatan-onan ‘Skills Training Expo and Job Fair’ diha sa Centrio Ayala Mall, ning syudad.

Photo from Councilor Suzette Daba's FB page

Niini, si Konsehal Suzette Magtajas-Daba, Chairman sa Komite sa Edukasyon, miaghat sa tanang kwalipikadong kabatan-onan sa pag-apply sa maong scholarship program.

Ang maong programa sa kagamhanan nga gidumala sa buhatan sa City Education and Development Department ubos ni Department Manager Richel Petalcurin-Dahay, gitagana alang sa mga Out-of-School Youth (OSY).

Giklaro ni Konsehal Daba nga ang mga kabatan-onan nga walay trabaho nga nag-edad og 18 anyos pataas, residente sa syudad, migradwar sa junior high school, wala pa nakapahimulos sa mga scholarship program sa syudad ug wala na-enrol, nabagsak, miatras sa bisan unsang TVET scholarship program, ang unang hatagan sa prayoridad sa maong programa.

Nasayran nga nagsugod niadtong Agosto 12 ang pagpangdawat sa mga aplikasyon ug moluntad lamang hangtud Agosto 30, ning tuig.

Photo from Councilor Suzette Daba's FB page

Matod sa konsehal nga dako kini kaayo nga kahigayonan kun mapili silang benepisaryo sa maong programa kay mahatagan gayud sa maayong panginabuhian.

Niini, siya nanawagan sa mga ginikanan ug mga interesadong kabatan-onan nga mag-apply online pinaagi sa link: bit.ly/RISETVETApply2024.

Alang sa dugang detalye ug impormasyon, iyang giagni ang mga interesado sa pagbisita sa FB page sa CdO City Scholarships Office ug mahimong motawag sa numero 0929 819 0819. ()