Suzette malaumon matukod Oro Special Educ Center

Gipasalig ni Konsehal Suzette Magtajas-Daba, chairman sa komite sa edukasyon, nga maapil ang paghimo sa modernong Special Education Center dinhi sa dakbayan sa Cagayan de Oro.

Kini ang gibutyag sa konsehal atol sa sesyon niadtong Lunes nga gidumala ni Bise Mayor Bebot Rodriguez agi’g reaksyon sa taho ni Konsehal Girlie Balaba kabahin sa mga panginahanglanon sa Deaf Association of Misamis Oriental (DAMOR), Incorporated.

Matod ni Daba nga ang tanan nilang mga panginahanglon iya nang giduso ngadto sa Local School Board (LSB) human nakabisita sa iyang buhatan ang maong grupo ug dako iyang paglaum nga kini maapil sa agenda sa sunod nga tigom sa LSB.

Sa susamang higayon kusganong gipahibalo ni Daba nga nagpadayon ang pagtukod sa 52 nga lawak saringan diha sa City Central School ug gilaumang makompleto sa tuig 2024. Kabahin niini ang modernong Special Education Center alang sa mga adunay kabilinggan sa panglawas kon Persons with Disability (PWDs).

Ako malaumon nga ang maong center makatabang og dako sa atong mga PWD’s nga magamit diha sa ilang pagbansay aron makab-ot ang dugang kaarangan sa kinabuhi, panapos ni Konsehal Suzette Magtajas-Daba.