Supplementary feeding programpadayong ipatuman sa CDO

PADAYONG mapatuman dinhi sa dakbayan sa Cagayan de Oro ang feeding program alang sa kabataan nga nag-edad og dos ngadto sa kwatro anyos.

Kini human ang konseho sa syudad ubos ni Bise Mayor Bebot Rodriguez sa sesyon kagahapon, mihatag og panugot ni Mayor Klarex Uy pagpirma sa Memorandum of Understanding (MoU) tali sa rehiyonal nga buhatan sa Department of Social Welfare and Development (DSWD-10) alang sa pagpatuman sa Supplementary Feeding Program (SFP) subay sa Republic Act 10410 kon Early Years Act of 2013 ug RA 10533 kon Enhanced Basic Education Act of 2013.

Si Konsehal Girlie Balaba, chairman sa komite sa social services ug usa sa nagpaluyo sa gipalabang nga ordinansa alang sa maong katuyuan, mibutyag nga kini ang ika 12 nga bahin sa pagpatuman sa programa dinha sa mga day care centers ug susamang fasilidad sa dakbayan sulod sa 120 ka adlaw.

Ang DSWD maoy mopalit sa gikinahanglang gamit sa programa sama sa pag-apod apod og dry rations, nutripacks ug nutribun ingon man fresh milk aron matubag ang panginahanglanon sa kabataan ilabina nga wala pa gipatuman ang face to face ECCD sessions.

Samtang ang dakbayan maoy magtumbok sa mga benepisaryo pinaagi sa CSWD ug City Nutrition Committee.

Niini, si Balaba malaumon nga ang padayong pagtambayayong sa lokal nga kagamhanan ug mga nasudnong ahensya sa gobyerno maghatag og kahigayonan sa kabataan nga mapalambo ang ilang makat-onan tungod kay mahatagan kini sa tukmang pagkaon nga gikinahanglan sa ilang lawas.

Ang ordinansa nga gipalabang sa konseho alang sa maong katuyuan gipaluyohan usab sa komite sa pamalaod ni konsehal Ian Mark Nacaya.