Supplementary feeding program padayong ipatuman sa CDO

GILANTAW nga padayong mapatuman dinhi sa dakbayan sa Cagayan de Oro ang feeding program alang sa kabataan nga nag-edad og dos anyos ngadto sa kwatro anyos.

Kini human giduso ni Mayor Klarex Uy ngadto sa konseho sa syudad ubos ni Bise Mayor Bebot Rodriguez ang sugyot Memorandum of Understanding (MoU) tali sa rehiyonal nga buhatan sa Department of Social Welfare and Development (DSWD-10) nga naglangkob sa pagpatuman sa ika-13 nga hugna sa Supplementary Feeding Program (SFP) subay sa Republic Act 10410 kon Early Years Act of 2013 ug RA 10533 kon Enhanced Basic Education Act of 2013.

Sa maong sugyot MoU, nasayran nga kini ang ika 13 nga hugna sa pagpatuman sa programa dinha sa mga day care centers ug susamang fasilidad sa dakbayan nga molungtad sulod sa 120 ka adlaw.

Niini, ang DSWD gitahasan nga maoy mopalit sa gikinahanglang gamit sa programa sama sa pag-apod apod og dry rations, nutripacks ug nutribun ingon man fresh milk aron matubag ang panginahanglanon sa kabataan.

Samtang ang dakbayan maoy magtumbok sa mga benepisaryo pinaagi sa CSWD ug City Nutrition Committee. Ang maong sugyot MoU gipaabot konsiderahon sa komite sa social services ni Konsehal Girlie Balaba aron mapalabang sa konseho ang gikinahanglang balaod nga maghatag og katungod sa mayor pagpirma nahisgotang MoU.