Sugyot pagmugna og TF Oro Rescue of Women padayong tun-an

Padayong tun-an sa Komite sa Women and Family Relations ni Konsehal Imee Moreno ang sugyot balaodnon nga magmugna sa Task Force Oro Rescue of Women (TF-ORoW).

Kini human nagtigom ang komite kagahapon ug nagtuki sa sugyot ordinansa nga gilantawng magpalig-on sa mga lakang nga maprotektahan ang kababayen-an pinaagi sa paghatag og restriksyon sa mga entertainment establishments, magpalambo sa suporta sa mga biktima ug paghatag sa ilaha og puloy-anan ug mamintinar ang database sa mga biktima sa human trafficking.

Ang tigom gitambongan sa mga representante sa City Social Welfare and Development Department (CSWD), City Legal Office, City Health Department, Department of Labor and Employment (DOLE), Balaod Mindanaw, National Bureau of Investigation (NBI), ug uban pang ahensya nga may kalambigitan pagtunol sa serbisyo ngadto sa kababaehan. Giingon nga ang database labing gikinahanglan aron mahuptan ug matunol ang gikinahanglan nga impormasyon ilabina ngadto sa mga biktima sa human trafficking.

Niini, si Bise Mayor Bebot Rodriguez, kinsa nangamahan sa sugyot balaodnon, mipasalig nga kanunayng maningkamot nga mahatag ang mga panginahanglanon aron mapatuman sa hingpit ang balaod nga magproteher sa mga biktima sa human trafficking.