Sugyot paggamit sa CCS building konsiderahon sa Public Works, Educ

Atong tan-awon kini pag-usab aron mahatag na ang kahigayonan nga magamit sa kabataan ang gambalay sa City Central School.

Kini ang reaksyon ni Konsehal John Michael Seno, chairman sa komite sa Public Works sa taho ni Konsehal Roger Abaday atol sa sesyon niadtong Lunes nga gidumala ni Bise Mayor Bebot Rodriguez kabahin sa paggamit sa maong gambalay.

Matod sa konsehal nga adunay panaglahi nga rekomendasyon tali sa Department of Public Works and Highways (DPWH), buhatan sa Building Official (OBO) ug City Engineer’s Office. Sa iyang pagpakighinabi sa OBO, adunay gihimong retrofitting project kay daghan nakitang buak-buak dala sa pagkasunog niini samtang ang DPWH miingon nga unta giusab ang pagtukod.

Niini, gipaabot konsiderahon sa komite ni Seno ang maong butang ug iyang gipasalig nga pangitaan og pamaagi nga masolosyonan ang isyu tungod kay importante kaayo nga magamit na sa kabataan ug magtutudlo ang mga lawak saringan.

Sa susamang higayon si Konsehal Suzette Magtajas-Daba, chairman sa komite sa edukasyon, mibutyag nga isip sakop sa LSB iduso ngadto sa LSB ang panawagan aron magahinan sa igong pundo gikan sa Special Education Fund ang pagtul-id o pagtukod niini.

Gipasabot ni Daba nga konsiderahon usab ang pagsaka sa populasyon sa mga tinun-an diha sa maong tunghaan nga nanginahanglan og luwas nga lawak saringan ug adunay kapaseguroan nga gambalay.