Sugyot pagdisplay sa ID sa taxi drivers, giaksyonan sa LTFRB - Esparcia

GIAKSYONAN sa Land Transportation Regulatory and Franchising Board (LTFRB) ang resolusyon sa Komite sa Public Utilities ubos ni Konsehal Romeo Calizo  nga naghangyo sa higpit nga implementasyon sa reglamento sa MC No. 2014-020 nga nagrequire sa tanang  operators sa taxi alang pag-display sulod sa ilang taxi units sa identification card sa driver nga dunay ngalan ug hulagway sa drivers ug ubang impormasyon sa taxi operators.

Kini ang impormasyon nga gipaabot ni Konsehal Malvern Esparcia sa sesyon sa konseho niadtong Martes nga gidumala ni Bise Mayor Bebot Rodriguez human iyang gipahibalo  ug gibasa ang tubag sa ahensya.

Mibutyag si Esparcia, nga isip membro sa komite ug kinsa mao usab ang nagspecial report sa isyu kalabot sa taxi drivers, nalipay siya nga nagpatawag na og tigom ang ahensya sa mga hintungdang taxi operators sa syudad ug lakip kini sa ilang gihisgutan.

Hinoon, gipasabot ni Konsehal Esparcia nga daghan kaayong mga buotan ug matarong nga taxi drivers apan nadamay lang sa pipila ka mga badlongon nga drivers nga nakadaot sa imahe sa taxi industry sa syudad.