Sugyot nga Student's Rights Welfare Code padayong tukion

Gipaabot hisgutan sa hiniusang tigom sa komite sa edukasyon ni Konsehal Suzette Magtajas-Daba ug komite sa sports and youth development ni Konsehal John Michael Seno ang sugyot ordinansa nga magmugna sa Comprehensive Code diin mahan-ay ang katungod ug kaayohan sa mga tinun-an kon Students’ Rights and Welfare (STRAW) alang sa dakbayan sa Cagayan de Oro.

Mahinumdoman sa milabayng tigom sa duha ka komite gipasumete ang kadagkoan sa Oro Youth sa final draft sa balaodnon uban sa pag-abag ni IBP President-Misamis Oriental Chapter Atty. Katrina Mordeno aron mahan-ay ug matino ang kamahinungdanon sa maong balaodnon.

Niini, ang duha ka komite nagdapit nila ni city administrator Atty. Roy Raagas, city legal officer Atty. Kenneth Tamala, Oro youth manager Lord Saver Centina, city DILG director Engr. Jane Docallos ug pipila ka mga namunoan sa nagkadaiyang tunghaan sa dakbayan ug mga hintundang ahensya sa gobyerno pagtambong sa gitakdang tigom karong alas 2 sa hapon dinha sa hawanan sa konseho aron paghatag sa ilang panahom ug opinyon.

Ang tigom gipaabot usab tambongan nila ni Konsehal Imee Moreno, Roger Abaday, Jay Pascual, Malou Gaane, George Goking, Ian Mark Nacaya, James Judith II ug Bise Mayor Bebot Rodriguez.