Sugyot nga peryahan regulation law tun-an sa konseho

TUN-AN sa Komite sa Games and Amusement ni Konsehal Roger Abaday ang giduso sa Regulatory and Compliance Board (RCB) nga Peryahan Regulation Ordinance.

Ang maong sugyot balaodnon naghan-ay sa mga giya ug patakaran dinha sa paglukat sa gikinahanglang panugot alang sa pagpahigayon og peryahan, karnibal ug susamang mga kalihokan dinhi sa dakbayan sa Cagayan de Oro.

Subay sa maong sugyot, ang mayor maoy maghatag sa katungod, pribilihiyo ug special permit alang sa pag-operate sa mga karnibal, peryahan, parlor games ug susamang mga kalihokan kun makasunod sa gilatid nga mga rekisitos sama sa pagsumete sa barangay certification, RCB endorsement, Office of the City Building Official (OBO) certification ug City Planning and Development Office (CPDO) endorsement.

Niini, walay si bisan kinsa nga makasugod sa ilang operasyon sa karnibal, peryahan ug susamang mga kalihokan kun dili una makakuha sa special permit gikan sa buhatan sa mayor.

Dugang pa, gisugyot nga walay maka-operate nga peryahan o’ karnibal dinha sa mga unnumbered barangay kun dili nunot sa kasaulogan sa ilang kapistahan samtang sa mga numbered barangays, gitugot lang ang usa ka peryahan o’ karnibal matag distrito ug ang operasyon sulod lang sa 30 ka adlaw sa dili pa ang pista sa dakbayan ug 30 ka adlaw human sa kasaulogan sa tinuig nga pista.

Ang sugyot nagpahamtang og multa nga P5 mil alang sa unang kalapasan, pagsuspende sulod sa pito ka adlaw alang sa ikaduhang kalapasan, ug alang sa ikatulo ug sunod nga mga kalapasan, pagbakwi sa katungod nga gihatag ug hangtod sa hangtod nga did-an nga maka-operate sulod sa teritoryo sa dakbayan.