Sugyot MoA tali sa CDO, CSC-10 konsiderahon sa komite sa pamalaod

KONSIDERAHON sa komite sa pamalaod ni Konsehal Ian Mark Nacaya ang sugyot nga Memorandum of Agreement (MoA) tali sa kagamhanan sa dakbayan sa Cagayan de Oro ug rehiyonal nga buhatan sa Civil Service Commission (CSC-10).

Kini naglangkob sa pagdestino ni Oliva Sacala, kawani sa lokal nga kagamhanan sa Cagayan de Oro, ngadto sa opisina sa CSC-10 sulod sa tulo ka tuig.

Ang maong sugyot nga MoA pinasubay sa Section 3 sa 1987 Constitution nga nag-ila sa CSC isip central personnel agency sa gobyerno ug gitahasan sa pagmugna sa career service ug pagsagop sa angayang mga lakang nga mag-promote sa kadasig, integridad, katuhay, kalamboan ug kortesiya sa serbisyo sibil.

Hinuon, subay sa sugyot nga MoA, ang kagamhanan sa dakbayan magpabiling employer ni Sacala apan ang administrative supervision mapasa na sa buhatan sa CSC-10.