Sugyot Halal ordinance gilantaw magdani sa mga negosyante pag-abag sa Halal industry

Dakong tabang sa ekonomiya ang pagpalabang og ordinansa nga magsuporta sa pagpalambo sa Halal Industry dinhi sa dakbayan.

Mao kini ang gitinguha nila ni Konsehal Girlie Balaba ug Ian Mark Nacaya dinha sa pagduso sa sugyot ordinansa nga mag-regulate sa paggamit sa halal logo ug mag-agni sa mga establisamento pagpahimutang og halal section o’ pagtinda sa mga produktong adunay halal certification.

Sa tigom sa komite sa social services sa milabayng semana nga gitambongan nila ni Konsehal Balaba, Nacaya, Malvern Esparcia, Yvy Emano ug Aga Suan ug sa mga representante sa Office of Muslim Affairs, National Commission on Muslim Filipinos, Oro Chamber ug mga departamento sa City Hall, gituki ang pagpalabang sa ordinansa nunot sa Akta Republika 10817 kon Halal Export Development and Promotion Program.

Niini, gisugyot ang pagpahamtang og multa sa paggamit sa halal logo nga walay saktong akreditasyon o’ sertifikasyon gikan sa Halal certifying body. Samtang giaghat usab ang mga establisamento sa pagtamod sa mga patakaran dinha sa pagbaligya sa halal products sama sa paglain sa halal ug dili halal nga mga produkto, pagpahimutang og halal lane, pagseguro nga ang mga pansayan sa mga establisamento adunay bidet ug pagtagana og prayer room nga hitsas sa Qiblah markings.

Sa tigom, ang representante sa Oro Chamber mipasabot nga makatabang sa ekonomiya ang lakang tungod kay matod pa naulahi na ang nasud itandi sa ubang nasud sa Asia dinha sa pagpalambo sa halal industry.

Giingon nga ang halal products dili lang kini alang sa mga Muslim kun dili alang sa tanan. Niini, si Balaba miduso sa sugyot ordinansa ngadto sa komite sa pamalaod ni Nacaya alang sa dugang pagtuon ug posibleng pagsukip niini sa agenda sa umaabot sesyon sa konseho.