Sugyot bahin sa Sonampat Festival Week tukion sa Kom sa Turismo

HISGOTAN sa Komite sa Turismo ni Konsehal Jay Roa Pascual atol sa tigom karong alas 9:30 sa buntag diha sa hawanan sa konseho ang sugyot ni Konsehal Girlie Balaba sa pagdeklarar sa kataposang semana sa bulan sa Marso matag tuig isip Sonampat Festival Week.

Buot sa konsehal nga diha sa selebrasyon, masaulog ang kasaysayan sa syudad, lokal nga kultura, ug mga kabilin pinaagi sa mga awit ug arte.

Subay niini, gidapit sa komite sa pagtambong sa maong tigom  aron madungog ang ilang mga hunahuna ug opinyon sila si City Administrator Atty. Hilario Raagas, City Legal Officer Kenneth Tamala, Acting Dept Manager, City Tourism and Cultural Affairs Office Mark Kenneth Jalapadan ug OIC-Historical Commission City Museum Jesus Christopher Salon.

Gipaabot usab nga motambong sa tigom sila si Konsehal Girlie Balaba, Aga Suan, Suzette Daba, Imee Moreno, Joey Abbu, Jr., Yan Lam Lim, Edgar Cabanlas, Christian Rustico Achas ug Bise Mayor Bebot Rodriguez.