Suan naninguha mapalambo serbisyo sa sugang dagitab

DAKO ang paglaum ni Konsehal Aga Suan, Chairman sa Komite sa Energy, nga mapalambo pa ang natad sa enerhiya dinhi sa dakbayan.

Kini human gituki sa tigom sa komite kagahapong adlawa ang sugyot nga Memorandum of Agreement (MOA) tali sa Misamis Oriental-1 Rural Electric Service Cooperative, Inc. (MORESCO-1) ug kagamhanan sa dakbayan sa Cagayan de Oro kabahin sa hingpit nga pagpatuman sa Department of Energy Act of 1992 ug Electric Power Industry Reform Act of 2001.

Ang maong mga balaod naglatid sa paggahin og balor 25% sa matag sentabo matag kilowatt-hour alang sa Development and Livelihood Fund (DLF) ug 25% matag sentabo per kilowatt-hour (0.01/kWh) alang sa Reforestation, Watershed Management, Health and/or Environment Enhancement Fund (RWMHEEF).

Ang maong P0.0025/kWh bahinon sa pagpatuman sa nahisgotang mga proyekto ubos sa maong duha ka pundo diin 5% alang sa apektadong komunidad, 20% sa barangay, 35% sa munisipyo o’ syudad, 30% sa probinsya, 5% sa ICCs/IPs 5%, ug 5% sa rehiyon.

Ang MOA giduso ni Suan ngadto sa buhatan sa City Legal alang dugang pagtuon ug rekomendasyon ug sa buhatan sa City Treasurer alang sa posibleng pag-abli og Special Trust Fund alang sa maong katuyuan.