Suan nahingawa nga dili tanang asosasyon sa mangingisda ang makadawat sa kahimanan

GUSTO man nato nga direktang ipanghatag ang mga kahimanan ngadto sa mga mangingisda, apan kinahanglan napahayag unta kini diha sa Memorandum of Agreement (MOA) uban ang 24 ka asosasyon sa mga mangingisda.

Kini ang gibutyag ni Konsehal Aga Suan, Chairman sa Komite sa Energy, atol sa miaging hiniusang tigom sa Komite sa Fisheries and Aquatic Resources ug sa Komite sa Agriculture nga gidumala ni Konsehal Christian Rustico Achas human gituki ang ganti balor P2 milyones gikan sa programa sa Bureau of Fisheries and Aquatic Resources nga Malinis at Masaganang Karagatan (MMK).

Nasabtan sa konsehal nga ang maong ganti gi-award sa BFAR ngadto sa Syudad ug walay tuyo nga kini direktang ipang-apod-apod ngadto sa mga mangingis

da, tungod kay ibase man kini sa ilang mga panginahanglan, alayon sa kumpirmasyon ni City Agriculturist Paterno Gonzales, Jr.

Matod ni Suan nga tungod kay aprobado naman ang MOA, anaa na sa Syudad pinaagi sa buhatan sa City Agriculturist, ang pagsuta kon unsa nga asosasyon ang nanginahanglan ug angayan unahon paghatag sa gipangpalit nga mga kahimanan.

Niini, si Konsehal Suan kusganong misugyot nga sa sunod nga mga ganti nga susama niini, kinahanglan mapahayag gayod diha sa MOA nga kining mga kahimanan ipang-apod-apod gayod ngadto sa hintundang asosasyon.