Suan misuporta sa Langag Cave management plan

KUSGANONG gisuportahan ni Konsehal Aga Suan ang pagsagop sa Langag Cave Management Plan alang sa preserbasyon ug proteksyon sa Langag Cave diha sa Barangay Dansolihon. Kini ang pamahayag sa konsehal atol sa miaging hiniusang tigom sa Komite sa Environment ni Konsehal Roger Abaday ug Komite sa Turismo ni Konsehal Jay Pascual.

Nasayran nga tumong sa maong plan nga mahimo ang saktong pagdumala sa maong langob nga maglambigit sa lokal nga kagamhanan ug mga stakeholders alang sa pagseguro sa operasyon sa ecotourism uban sa hugtanong pagkonserba niini.

Matod ni Suan nga magdala sa dugang kaarangan sa natad sa turismo sa dakbayan ang maong lakang gawas nga makatabang usab sa komunidad sa barangay pinaagi sa pagdala og kahigayonan sa pagpanarbaho.

Ang lakang giduso sa komite ngadto sa Komite sa Pamalaod ni Konsehal Edgar Cabanlas aron masukip sa mga butang nga hisgutan sa Konseho.