Suan misugyot og 50% nga omento sa cash awards sa mga atleta

UNTA atong konsiderahon ang 50 porsyentong (50%) omento sa cash incentives/awards nga gitunol ngadto sa mga atleta sa dakbayan.

Kini ang sugyot ni Konsehal Aga Suan sa milabayng tigom sa komite sa Sports and Youth Development ni Konsehal John Michael Seno human gituki ang sugyot ordinansa nga maghatag og giya alang sa pagtunol sa cash incentives/awards ngadto sa mga Kagay-anong atleta nga makadaog sa mga kompetisyon lokal man o’ international. Kini base usab sa rekomendasyon ni City Budget Officer Atty. Percy Salazar nga himuong parehas ang porsyento sa ipatumang omento aron patas ang pagsaka matag kategorya.

Niini, si Suan misugyot ang 50% flat rate ang ipatuman sa tinguha nga mas madali ang proseso sa pagkwenta sa angayang hatagan og dugang insentibo. Ang tigom sa komite ni Seno gitambongan usab ni Konsehal Roger Abaday.