Suan misugyot mahataga’g prayoridad ubang proyekto sa gobyerno

HUGOT nga gisugyot ni Konsehal Aga Suan nga mapundohan usab ang mga proyekto ug programa nga maghatag og dugang kaarangan sa kinabuhi sa mga Kagay-anon.

Mao kini ang gisugyot sa konsehal atol sa sesyon sa Konseho niadtong Lunes nga gidumala ni Bise Mayor Bebot Rodriguez human gituki ang resolusyon nga naghatag og katungod ni Mayor Klarex Uy nga makig-negotiate sa mga banko alang sa gilaraw’ng paghulam og P2.5 bilyones.

Mas labing maayo nga mahatagan og prayoridad ang mga proyekto nga labaw’ng gikinahanglan sa katawhan alang sa gilarawng hulamon nga P2.5 bilyones kaysa gilaraw nga pagtukod og bag-ong City Center, pasabot ni Suan.

Niini, siya namahayag nga dili siya supak sa kalamboan sa dakbayan apan supak siya sa planong pagpangutang alang sa pagbalhin sa City Hall ug pagpalit sa dugang lote nga tukuran tungod kay aduna pay mga proyekto nga labaw’ng nagkinahanglan og pundo ug pagpatuman kaysa pagtukod sa bag-ong City Center.