Suan miawhag sa mga negosyante pagtamod sa balaod

“ANGAYANG sundon ang balaod.”

Mao kini ang pamahayag ni Konsehal Aga Suan atol sa milabayng tigom sa Komite sa Trade and Commerce ni Konsehal George Goking human gituki ang lakang pagpatuman sa balaod nga nag-require sa akreditasyon sa mga Service and Retail Shops (SRS) dinha sa Department of Trade and Industry (DTI).

Sa maong lakang, gisugyot nga mamahimong kabahin sa paglukat ug pag-renew sa business permits sa syudad ang akreditasyon sa DTI.

Gipasabot ni Suan nga dili angayang supakon ang balaod tungod kay tumong niini nga maproteksyonan dili lang ang mga konsumante kun dili ang mga nanag-iya usab sa mga establisamento.

Hinuon, siya midugang sa pagpadangat sa mulo sa mga negosyante ngadto sa buhatan sa Anti-Red Tape Authority (ARTA) aron mapasayon ang pagkulat sa gikinahanglang akreditasyon.