Students’ rights, welfare code sa CDO padayong gitun-an

Padayong tun-an sa komite sa edukasyon ni Konsehal Suzette Magtajas-Daba ug komite sa sports and youth development ni Konsehal John Michael Seno ang sugyot ordinansa nga magmugna og comprehensive code nga maghan-ay sa mga katungod ug kaayohan sa mga tinun-an kon Students’ Rights and Welfare (StRaW) alang sa dakbayan sa Cagayan de Oro.

Sa milabayng tigom sa duha ka komite, gipasumete ang kadagkoan sa Oro Youth sa final draft ordinance uban sa pag-abag ni IBP President-Misamis Oriental Chapter Atty. Katrina Mordeno aron mahan-ay ug matino ang kamahinungdanon sa maong balaodnon.

Gitahasan usab sa komite pagsubmite sa ilang position paper ang Armed Forces of the Philippines (AFP) ubos ni 4th ID Commander Maj. Gen. Wilbur Mamawag ug Philippine National Police (PNP) ubos ni City Police Director-COCPO P/Col Aaron Mandia.

Nagpasalamat sila si Daba ug Seno sa mga hintundang institusyon sa suporta nga gipadayag alang sa maong balaodnon dala ang paglaum nga makahatag kini sa dugang proteksyon sa mga tinun-an.

Ang duha ka komite subling magtigom sa umaabot Marso 3, 2023 ug gipaabot nga motambong sa maong tigom ang mga namunoan sa nagkadaiyang tunghaan, hintundang ahensya sa gobyerno ug pipila ka mga mga hepe City Hall.

Ang milabayng tigom sa duha ka komite gitambongan nila ni Konsehal Aga Suan, Yvy Emano, Bernie Esparcia ug Imee Moreno.